虛無成為了這裡的流行性感冒。

資訊與科技發達，隨時隨地都可以吸收不同知識，想要學習一套新技能只要像《22世紀殺人網絡》的主角一樣，把相應的卡帶下載到自己的腦核中便可。

道德責任已不復存在。由於人體已有自動復原能力，我們不需要再為傷害別人身軀而付上法律責任。應該是說，警局和法庭不會再受理。

這裏有個城邦，我們稱之為極樂樂園。在樂園裡面你可以穿上制服身軀，拋開一切日常的身份與地位，甚至人格，在裡面盡情享樂與發洩。

今天是拍攝紀錄片的日子。你清晨便要起床執拾，矇著眼睛看之前所寫下的清單，以確保沒有任何疏漏。

你用冷水洗了個面，穿上提早燙直了的恤衫與西褲，匆忙之際，從門旁拿起寫著「政制及資訊事務局」的職員證，並夾在恤衫口袋上。

與同事會合後，你們以工作人員身份步入場地，開始架起相機。

華特先生站在台上，稍微整理好手袖扣與領呔夾的位置，在眾人敬慕的目光下開始了致詞。

「尊敬嘅各位來賓，女士們，男士們：

大家好！

首先，好多謝各位嘉賓嘅來臨，要晨咁早嚟到呢度都實在唔容易。」

台下傳來一片愉悅的笑聲。

「今日係「極樂樂園」開辦三十週年嘅日子，非常慶幸有大家多年嚟嘅支持。尤其要感謝各政府部門同香城中旅集團近年嘅鼎力支持以及幫助。」

掌聲與歡呼聲遍佈滿場。

「仲記得五年前，隨著社會資訊科技嘅突然進步，極樂樂園都面臨倒閉危機，甚至曾經要停業好一陣。但多得政府同香城中旅集團嘅及時支援，樂園得以以全新方向發展，同時秉持原來「為人類帶來極樂體驗」嘅初衷。」

華特先生眉頭一鬆，自信地繼續說：

「無論你係普通職場人士、上流人士、老人家、喺屋企做家庭主婦嘅定係明星都好，只要入到嚟，你就可以著上制服身軀，拋開一切日常嘅身份、地位，甚至包袱同顧慮，盡情享樂或者發洩！」

「雖然呢個新方向係實行開頭受到多方面嘅抨擊，但事實證明樂園嘅改革唔單止受廣大民眾嘅喜愛，仲要成功成為香城最受歡迎消遣場所之最。」

「另外再次重申，我哋嘅員工都係被派發翡翠級別嘅制服身軀，所以各位可以放心「傷害」佢哋，因為佢哋每日完場就可以相安無事咁更換身軀，保證唔會感受到絲毫痛楚！」

台下一片笑聲。

「再者，呢度嘅員工以前都係露宿街頭嘅乞丐或者係無業遊民。而多得政府嘅「重生出發計劃」，佢哋依家係樂園都有良好嘅待遇同福利，重新出發！」

「最後，想同大家分享多個好消息，就係極樂樂園已經連續兩年被譽為最好嘅社會建設之一！好高興近幾年見到樂園高速發展之餘，仲可以為社會帶嚟良好影響。自樂園重開以嚟，城市嘅犯罪率節節下降，壓力指數亦明顯減低。同時，數據亦顯示樂園有助緩解近年急速擴散嘅「虛無」怪病。」

「今後，我哋將會繼續提供同發展更多元嘅體驗俾大家，務求令大家樂極忘返！都係個句，Carpe Diem，活在當下！多謝各位。」

話音剛落，上空散落滿滿的彩紙，愉悅的演奏曲連同廣播聲響起：「歡迎大家來臨一年一度嘅極樂狂歡節，請跟隨路牌及在場人員指示進入樂園玩樂範圍，並請預先掃描牆上二維碼以揀取心儀制服。您嘅極樂體驗即張展開，祝您旅途愉快。歡迎大家來臨......」

紀錄完這盛大的開幕典禮，你便要立即跟團隊趕去下個場所拍攝素材。

（「過一過嚟，嗰度係咪員工室？快啲過嚟影下佢哋。」）

此刻員工們都在忙著換裝，準備應付接下來一整日的遊客。制服身軀按類整齊排列，非常壯觀。可以見到他們一個個從櫃臺領取完制服身軀，便排隊到智能更換室讓先進的機器把他們的意識轉移到制服身軀上。過程只需十五分鐘，相當便利。

員工室的角落裡，坐著一位已換裝成男童的員工。他體型瘦削，眼神帶點癡呆，板著面凝視著地毯上的花紋。主管拍了拍他膊頭，卻立即眼神突變，掛上了完美的天真笑容，彷似換了靈魂一樣。

雖然大家都換上了身軀，但你莫名覺得他就是你昨晚從資料中翻閱過的員工，是樂園方面預先挑選的受訪員工。據說他是「重生出發計劃」中的受益者之一，約四年前加入樂園，平時瘋瘋癲癲的，是最受歡迎的員工之一。

果然，主管把他帶到來鏡頭面前接受訪問。

「嗨！我叫阿萊，係極樂樂園嘅員工，今年7歲！講笑咋，呢套係我今日嘅戲服。」

阿萊捏著自己的外皮，向鏡頭展示。他這副身軀只有一米多高，雖然稱不上「靚仔」，但尚算標緻。最吸引人是他歡笑時的甜美笑容，以及那對呈半彎狀態的笑眼。

「平時樂園都好少俾外人拍攝內部情況，但... 嗱！機會難得！快啲睇下呢邊嘅制服身軀保存室，我地每日就係喺呢度被隨機分派唔同軀體。大隻型男又有，大波索爆靚女又有，阿豬阿狗、阿婆阿伯都有。總之你諗到㗎呢，都有。咁始終每個人口味唔同吖嘛。」

阿萊望了望鏡頭後的你們，然後再作補充。

「喂，你地唔好咁望住我先。嗱，其實我大概係樂園五年前重新開業嗰陣入嚟嘅，當初我都以為靚仔靚女最受歡迎㗎。但原來啲人挽耐左就會想試下新嘢...... 」

突然一聲爆炸聲打斷了阿萊的話。看來遊客們開始進場了。各種槍聲、打鬥聲、尖叫聲、交配聲就像在為樂園那交響樂主題曲伴奏，此起彼落，格外和諧。

主管把我們拉到比較隔音的紀念品區，那裡由於時間尚早，還沒開放。不過，還是能夠隱約聽到外面傳來的聲音。店鋪還有一塊大玻璃，可一睹玩樂範圍的風光。

貨架上放滿了林林總總的特色小物，譬如是用壞掉制服皮膚所製成的「環保銀包」和「環保卡套」，各種傷痕形成了獨一無異的紋路，平時很受歡迎。

此刻的阿萊隔著玻璃呆望窗前，個子矮小、樣貌無辜的他與出面的血腥、色情風景形成巨大對比。不過他的一邊嘴角卻微微戚起，隱約能聽到他的連連笑聲。他的左邊面依舊神情呆滯；右邊面卻像著了魔似的，半張面都彷彿在嘲笑窗外的人，同時在嘲弄自己。

主管拍拍阿萊膊頭，示意他繼續分享，阿萊立刻回過神來。

「係囉，總之極樂樂園帶多左好多可能性俾大家。邊個會估到當年好似我呢啲咁嘅迷失青年可以有高薪厚職，又可以日日體驗唔同嘅......「特別經歷」。」

阿萊繼續以燦爛天真的笑容望向鏡頭。身後的大玻璃在鏡頭的大特寫下，更能把其後發生的看得一清二楚。

「......同埋就係，樂園真係提供咗好多福利比我哋，待遇又好，又識到朋友，仲有得無限返生！真係好多謝華特先生，佢堅持連我哋嘅起居飲食都照顧埋！」

但被問到其身世時，他卻突然口吃起來，眼裡無光。

「......我 ……我應該 ......我以前好似 …... 都已經唔知幾時開始叫阿萊.......」 

語音未定，主管便擋住了鏡頭，示意你不要再拍。但阿萊繼續在他身後喃喃地道：

「我淨係記得一開頭...... 要我著女人皮，因為性感，因為我扮得性感！我諗我以前係搞藝術嘅......」

「但唔係吖！其實依家都無人再計呢啲...... 頭先都講過！」

你詫異地觀察著他，同時又知情識趣地停掉了錄影，因為你深知就算拍了都無可能可以播出。

主管雙手按住了阿萊的肩膀。再三確認沒被拍攝後，拿出了奶白色飲料餵他喝，再溫柔地用右手輕輕拍打他的背部。這彷彿就是母愛滿瀉的母親給初生嬰兒餵奶後掃風的情景。

冷靜過後，阿萊望向主管。主管輕輕指向了自己手腕上的錶面。

阿萊擠出了比剛才更燦爛的笑容，用小手一下子捉著了你的前臂，把你拉出了紀念品店。一踏出門，你便感受到截然不同的氛圍，那熟悉的古典音樂再次轉進你的耳蝸裡。矯情的叫床聲、粗獷的呼吸聲、槍林彈雨的拍子聲、溫柔的拳打聲、各種不同的笑聲與慘叫聲成為了極樂管弦樂團裡的樂器群組，互相配合與協調，編織成振奮人心的交響曲。樂曲從你的耳背緩緩地往下掃到耳垂，又再於你耳甲腔裡打轉，温婉地經過耳道和鼓膜，挑引著你的耳蝸與心窩。

人潮把你往前推，你抬頭一望，空曠的天空下橫屍遍野，人們都在各忙各的。雖然對樂園環境都頗有心理準備，但可能是第一次親身進場的關係吧，你渾身起了雞皮疙瘩。

你嘗試回首找你的團隊，但經已被撞到各散東西。幸好伸手一摸褲袋，還有預先準備的迷你飛行攝錄器。你本能地拿起遙控，按下了錄影鍵，並揀取了自動跟隨模式。

頓時，你被人推倒在地上，你極力反抗但卻無力掙脫。對方的重量彷彿是你的十倍，那刻你腦海一片空白，只覺得自己像一隻剛被百斤重的巨大漁網捆住的不幸花甲，動彈不能。你唯有花盡力氣大叫，卻更加激起對方的慾望，搓揉著你的胸部及私處。你歇斯底里地喊：「訪客！我是訪客！」並大力用頭指向掛在胸口上職員證。

對方愣住了一會兒，鬆開了手，意外地看著你。你癱坐在地上大力換氣，嘗試從極端恐怖中找回一絲理性。交響曲再次在你腦海中盤旋，臉上的汗珠輪流跳落到地上，輕輕為曲子附上節拍。你這才向上望，竟發覺對方是個......披著狼皮的人。

「你...... 無嘢吖嘛？」他用比剛才溫柔許多的聲線問到，但可以聽得出一絲疑惑和詫異。

你本能地往後退，但又想著紀錄片的重要工作，於是你喘息未定地問了對方的名字並說明自己的來意。

他笑著轉向微型相機。

「嗨！喺度你可以叫我做強尼。」

「喂，頭先真係唔好意思，真心無諗過竟然有人係未入過嚟挽。其實我當初都係咁，好唔慣呢度。但呢，當你着咗啲皮上身，人哋又著緊嘅時候，你就會發現原來可以咁自在、無拘無束。你真心要試下。」

「就好似呢套皮咁，摸下，佢係特製狼皮嚟㗎！同埋今次我特登揀咗unisex款嚟試，又幾刺激吓。」

強尼很興奮地展示著他所選的身軀，並讓你試摸。你用左手輕力掃過那外皮，觸感柔軟，又嗅到些少野獸外皮參雜著血腥的異味。他的友善與剛伏再你身上時的獸性截然不同，於是你好奇地探問他來樂園的原因。

「喔，咪同好多人一樣，咁呢十幾年發生咗咁多事，共產吖嘛，改革吖嘛。咁但係改完咪又係搞到我呢啲普通市民囉。哇，你知唔知啱啱轉制嘅時候我幾唔慣，返工嗰邊又變到長期無得升職，屋企又喺度嘈。諗返嗰排真係好大壓力，咁咪試下過嚟解放下囉，點知又真係幾有效窩。入到嚟呢，就好似乜都唔使諗、唔使煩，理得外面發生咩事！喺度真係做咩都得，你無聊入嚟挽下又好，激氣入嚟打下人、破壞下嘢又好，有需要嘅時候...... 你知㗎啦，總之就乜都得啦！呢種自由，個個試過之後都翻唔到轉頭㗎！」

他的眼裡透著光，像著了魔似的，非常滿意樂園所帶給他的所有。

「其實反而平時出翻去唔慣吖！總係有種虛無嘅感覺，不過耐唔耐嚟挽下就無嘢。大家都係咁。」

問其對樂園裡員工的看法，他繼續悠然自得地說：

「其實做呢度嘅員工都幾好吖，日日都有得入嚟挽。係，雖然佢地成日係比人打、比人屌嗰個，咁但又有咩問題窩，又唔會真係死嘅。佢地福利幾好啊你知唔知？再講吖，佢地以前咪又係乞衣，一係就殘障嘅，一係就無所事事、一日到黑都係度抗議嗰啲𡃁仔𡃁妹囉。咁依家日日有人供食供住幾好吖。」

此時，樂園內再次傳來廣播聲：

「各位先生女士、珍禽異獸，狂歡派對好快就要開始，請大家盡情享受淨返嘅十五分鐘時間，然後好讓我哋嘅工作人員換裝再同大家挽過！各位先生女士......」

聽到廣播後，強尼向你請辭，把握時間繼續玩樂。你看見他的身影奔向前方，一腳踩爛了車子的倒後鏡，再拾起當成武器般毆打旁邊的一位跛腳老婆婆。老婆婆應聲倒地，頭破血流，奄奄一息。短短十秒間，強尼經已般若兩人。 

你加緊腳步從後跟著它。只見它繼續揮武那鏡子，見人就打。驟眼看鏡子已破裂，被血漿玷污得模糊，被隨手丟掉。它突然停了腳步，向前定睛，像被什麼吸引。它緩步向前，用右手輕柔地撫摸著一名女子臉上那道新鮮的疤痕，然後再深情吻了下去。又頓時伸手捉起左面男子的頭髮，把男子扯向自己後，又深深吻了下去。它續一撕開他們的衣服，再把自己的陽具輪流插進他們的體內。兩人早已殘破不堪，女子大腿上有著被車輾過的痕跡，男子腹部有著被刀多次捅過的傷痕。兩俱靈魂空洞的人偶任由強尼擺佈，慘叫聲陣陣傳來。而此刻的強尼，跟他的背後的狼皮一樣，就是一頭野獸。

你操弄手上的遙控，把迷你飛行攝錄器升到半空，目瞪口呆地俯瞰著樂園內的風光。場面極度震撼，因為強尼只是千千萬萬人裡面的其中一小點，其行為都只不過是這裏的常態。

你嚥下快要乾掉的口水，把攝錄器降回地面水平。再往剛才的方向一睹，強尼已拋棄了那對男女，奔向旁邊的人堆。那裡起碼有四、五個人，有老有嫩、有男有女，像圍著燒烤爐般一同幹著什麼。其中一人扔掉了一塊疑似是衣服的碎片，又有一人把沾滿鮮血的手往米白外衣後抹。

你在遠處只能聽到沙啞卻又帶點稚嫩的尖叫聲和軟弱的掙扎聲。於是，你用攝錄機小心上前窺探，只見他們像預先協定了般，分工按壓著中間的人。你再拉大畫面，嘗試以特寫鏡頭一窺主角的面目。

凌亂的瀏海，半月形的眼睛，空洞呆滯的眼神。

是阿萊。

他痛苦地大聲哭叫，時而望上天，時而緊閉著眼。汗流接踵從他的面頰滲落地面，在高清畫面下顯得格外清楚，幾乎可以想像放大後亦能從汗珠的折射看到強暴者們的顏面。你也不禁為他痛心，但亦知道若干涉了什麼，你便會是遭殃的那個。

圍著獵物的野獸們垂涎欲滴，猶如在餓了好幾天後獲得佳餚一樣，定睛望著午餐蓄勢待發。

其中一隻豺狼騎上了阿萊身上，夾硬用隨手執到的硬物塞進了他的肉穴裡，強制地撐大細縫。其餘的凶禽見狀便爭先恐後地玩弄著他，又有一虎豹強逼阿萊幫它口愛。餓狼們等不及輪候，便像小孩們爭奪玩具般，大力拉扯著阿萊，一不小心便撕開了其皮肉。它們舔著他的傷口，又肆意用力往裡面鑽；溫柔地撫摸著他，又繼續亢奮地肢解著他。它嚙開他的肉，它擔著地下的肉碎，它強逼他嚥下自己的部份。

阿萊渾身脫臼、周身瘀血、骨肉分離、血肉模糊，下半身似乎已失去知覺。

你以上帝視角諦視著遙控上的畫面，抽離地旁觀整個過程。

阿萊已疲弱得無法再叫，或許是喊到喉嚨出血，或許是放棄掙扎。他

黯淡無光、苦不堪言、痛徹心髓，唯有

任人宰割。

慘無人道。

。

。

。

廣播再次響起，主題曲漸漸收細，提醒著大家十五分鐘的時間已過，請遊客們離開樂園玩樂範圍。

凶殘飽食的他們泰然自若地直起身子，自律離場。

被遺下的阿萊躺在地上，被工作人員拖離現場，連同其他殘破不堪的軀體帶回回收站。

荒涼的園地只剩下陣陣血腥味和複雜的空氣。

整頓過後，你回到家中，換掉沾滿血與污跡的恤衫。

思考良久過後，你按下了刪除鍵。

而此刻的阿萊，剛被回收完畢，準備著更換下一套制服身軀。

重寫故事：以不同的觀點與角度去重寫極樂樂園

2038年10月8日 星期五 天氣：晴

聽日就係我第一日入樂園做嘅日子，有少少忐忑添。本來真係無諗過要應承，但一諗到要外面嘅屋企人，我真無辦法放心...... 點知嗰啲卑鄙嘅人會對佢地做啲咩...... 唉，橫掂我喺呢個鐵籠裡面都改變唔到啲咩，可以借做嘢之名出去望吓出面嘅世界都算係咁。 

聽講聽日嘅計劃其實係一場社會實驗，似乎係想測試樂園嘅方針可唔可行。當然我先唔會信單嘢會咁簡單啦，或者係想改造我哋、虐待我哋、打擊我哋...... 但我就係要證明比佢哋睇，咁樣係輕視咗我哋，要俾全世界知道我哋無咁脆弱。就算佢哋要繼續困住我哋，定係做咩都好，佢哋終究無辦法改變我哋嘅內心。

葉子穎，你要知道只要維持足夠信念，佢哋永遠無得改變你。唔駛驚，唔會有事嘅。

雖然喺唔太情願之下參與咗今次實驗，但都莫名有啲期待聽日嘅空氣、出面嘅味道。對上一次踏出呢堆爛銅爛鐵應該係...... 最後一次見屋企人個陣...... 咁耐無接觸過出面嘅世界，都幾好奇啲嘢變成點，唔知香城仲係咪我熟悉嗰個香城呢？唔知個樂園翻新過之後有幾唔同呢？（話曬我細細個都成日喺樂園度挽吖）

同埋講起上嚟，入咗呢度咁耐，睇嚟科技真係發達咗好多好多。如無意外，聽日喺樂園裡面仲有得著嗰種報紙上面見到嘅仿真人皮制服 （理論上受咩傷都可以之後換走，唔會經歷任何真實嘅痛楚）。竟然咁快就有得親身試著，諗起都有啲興奮。即管睇下係堅定流。

好啦，應該差不多到閂燈時間啦。今日就寫到呢度啦。

希望聽日相安無事。加油。要繼續相信。

2038年10月10日 星期日 天氣：晴

屌，攰死...... 

我就知係呃人㗎啦。話就話一到換場就可以即刻換制服，但屌...... 中間嗰個過程真係唔講得笑...... 樂園裡面啲人真係痴撚線...... 明明話係實驗嚟㗎嘛，點知今日一開波就有個阿叔懶係型咁攬埋嚟，仲要喺度摸身摸勢，你以為自己去咗夜總會？！痴撚線，一諗起佢係咁對我毛手毛腳就想死，毛管都棟曬，如果聽日再係咁我真係頂唔順...... 唉，究竟點先可以捱過呢五年...... 

不過之後仲誇張！無啦啦有個細路走過嚟叫我幫佢...... 咁我緊係唔肯啦，點知佢死都要捉實我，我掹開佢之後佢仲想記低我投訴，但我都理唔到咁多就跑開咗，希望無事啦...... 唉，真係唔明啲人嘅口味點解可以咁奇怪。況且入得場嘅理論上都喺成年人嚟㗎嘛，但又要扮細路？？？？真係有啲嘔心。

跟著記得晏晝場嗰陣就有一堆人係咁追住我嚟打，嚇到我係咁跑、係咁跑，我諗斷斷續續都跑咗成幾粒鐘咁濟吖！屌！有無咁好恆心吖？！人哋都係打份工㗎咋！唔知以為我係佢哋嘅獵物吖......  真係攰到就嚟虛脫濟，黃膽水都差啲嘔埋出嚟，咁大個人都未試過咁驚、咁辛苦...... 不過好彩走得甩咋，如果咪俾佢哋一齊㩒住打就慘啦...... 阿朗就無咁好彩啦...... 唔小心撠咗一撠，就就俾人係咁攞刀隊，搞到成地都染曬做血紅色，啲血腥味我依家仲隱約聞到...... 我喺隔離聽住佢啲慘叫聲都覺得勁心噏，感覺好似自己都俾人插埋一份咁。同埋最無力嗰個位係我企喺後面根本就無辦法幫到佢，因為俾班痴線佬發現一定會對付埋我...... 

依家一合埋對眼，就會即刻彈出阿朗俾人捅嘅畫面同聲...... 佢哋個個睩大對眼、好亢奮咁笑個樣真係好深刻咁印咗喺我個腦裡面，抹極都抹唔走。好想扻頭埋牆然後唔記得曬啲嘢...... 如果可以失憶就好...... 

其實佢哋究竟有無當過我哋係人？明明大家都係普通人，點解可以咁無情咁對我哋？仲要以為好好挽？！屌你老母！乜撚嘢實驗吖？根本就係特登整出嚟想挽殘我哋，由五年前俾人拉開始，根本都無一刻張我哋當人咁看待。就算呢幾日喺樂園有飽飯食咁又點？仲辛苦過之前吖！好後悔應承咗...... 

…...

不過反悔嘅話佢哋一定會搞出面嘅人...... 唉，好驚佢哋因為我有事...... 

五年啫！ 之前簽嗰份嘢話喺度捱到五年就會無條件釋放我出去，得嘅得嘅，無理由俾佢睇死。

唉屌，唔想講啦。

早抖。

2038年10月17日 星期日 天氣：晴

返下返下就過咗一個禮拜。屌，雖然都仲係好攰，但都無開頭個幾日咁辛苦，可能慢慢慣翻少少啦掛。發現著起咗件原本唔屬於自己嘅身軀，原來會有種莫名嘅抽離感。就算幾痛或者幾想搵窿捐，都可以匿埋喺件制服底下面，唔會俾人知我嘅真實身份。

不過啲人真係越嚟越猖狂...... 雖然我著住咗件假皮啫，但好歹都係個人吖！...... 我今日俾人派咗件大隻型男外皮，就即刻有個男人撲咗埋嚟搞我，仲要係上下其手個種...... 千祈唔好俾我知佢現實中係咩樣吖，諗起都打十個冷震。真係希望聽日可以抽到件皺皮老男人制服，咁就肯定無人掂啦！（不過可能會係咁俾人打...... ）

唉，我究竟做錯啲咩要受呢啲罪？呢個世界真係越嚟越痴線。個個好似著曬魔咁！好撚恐怖。其實我到依家都未消化到...... 真係接受唔到......  

但越係咁，就要越堅持！要信！要信總有一日可以出得返去！！要信...... 

話時話，仲有一樣好奇怪嘅事...... 佢哋依家每日都要我哋飲嗰支唔知咩「白兔牌健康營養飲料」，仲要規定我哋每日開工打卡前一定要喺鏡頭面前飲曬，話咩可以補充營養窩。但真係好撚奇怪囉，支嘢又白白地、杰撻撻咁款。雖然飲落口都幾好飲，有少少荔枝味加淡淡嘅椰奶味咁。好驚佢哋表面用補充營養嚟包裝，但又暗地裡就落啲咩不知名成份，想攞我哋嘅身體嚟做試驗...... 講真都唔知佢個實驗嘅真正目的係為咩，我哋就好似俾人綁住咗喺砧板上嘅白老鼠咁，隨時任佢屠宰...... 

假若真係要洗我腦嘅話...... 我會證明俾佢睇呢個做法係唔work，因為至少依家我都仲係好清醒。

加油！加油！加油！無事嘅......！

葉子穎，你要加油，要繼續相信。

2038年12月19日 星期二 天氣：陰

癲咗...... 大家都癲咗...... 

明明樂園以前都唔係咁，明明我以前都幾鍾意華特先生...... 明明以前佢係會肯企出嚟幫我哋發聲嗰個...... 真係好失望。

或者佢都係被逼。好似我咁。

點解咁短時間內大家可以變咗咁多？好似麻木曬咁。道德？樂園裡面完全唔存在呢個概念。真心覺得好恐怖...... 好想逃離呢個地方，好想走...... 好想...... 但我諗我已經無辦法面對出面嘅人，如果見到佢哋平時扮無事、扮正常嗰個樣我諗我會仲唔慣，我寧願見住一個個猙獰嘅行屍走肉。

另外，近排好易頭暈，嗰種感覺就好似飲完成晚酒之後醒翻嗰個狀態，要乏力軿湊翻啲記憶先唔暈。可能係呢幾個月見得太多血、太多嘔心嘅場面掛，搞到成日都周身唔聚財，個人好容易就唔集中...... 我淨係想抖下，個種無力感已經大到我無辦法再承受...... 幾時先捱得過五年......

葉子穎...... 撐住。

2038年12月25日 星期六 天氣：雨

聖誕快樂！聖誕快樂！聖誕快樂！

係我咁多年聽過最諷刺嘅一句說話。樂園竟然為咗搞噱頭整咗個聖誕狂歡節出嚟，仲要半價入場，結果就勁多人入嚟逼到爆曬。最衝擊嘅係啲人開頭等入場嗰陣仲誇張過以前爭拜頭炷香咁，成班野獸衝入嚟，誓要撞到塊紅旗為止。最慘嘅係我無得走，要默默咁化身做嗰塊紅旗，等俾人當聖誕禮物咁拆。有時真係好想錄低佢哋衝入嚟嗰個樣，震撼到你根本唔會覺得佢哋係活生生係社會出面過住正常生活嘅人。係咪已經嗰個都係咁......？嗰個都好似雙重人格咁，入到嚟就真係想點就點。呢個係咪已經變咗做正常不過嘅常態？！如果人性本身就係咁嘅話...... 好難想像到我嘅呢一面。更加想像唔到入嚟挽個堆喪屍入面究竟有幾多我識嘅人。好心寒...... 

今年佢哋加埋啲咩聖誕特別版制服身體，我仲要抽到件聖誕鹿套裝，瘋狂俾人係咁挽、係咁騎、係咁奴役。就算依家換翻自己身體，都仲好感受到嗰種攰，就好似不斷俾針拮咁，係咁提住我今日被人打、俾人踢、俾人姦嘅感覺。麻木得嚟有啲唔舒服。寫寫下，又好頭暈啦...... 唉。我。

同埋因為俾人用扣扯住行咗大半日咁濟，到依家都仲硬係覺得有條繩不斷勒住我條頸咁。感覺好似完完全全變咗隻畜生咁，任由佢哋擺佈、羞辱...... 

已經唔係好記得詳情，但其他人話試下捱到31號晚。一等到入1號凌晨嗰刻，我哋就一齊博命衝出去，有幾遠跑幾遠、有咩人就殺咩人，乜都唔好理，最好就炸埋個樂園佢。似乎大家都就嚟頂唔順，呢度實在太唔人道、太癲啦，再咁落去都唔係辦法。喺樂園裡面都真係好難步處個日點做，但聽講個晚班高層都會落埋場挽、遊客又多，應該無咁容易分到我哋出嚟。雖然好驚，但感覺呢次會係一次難得嘅反抗機會，失敗咗可能又要無止境地等。

所以...... 真係只許成功，不許失敗！希望...... 

加油加油加油！！！！

葉子穎，加油，希望個日無咁頭暈。聖誕快樂。

2039年3月4日 星期五 天氣：晴

飲咗好多白兔牌，個肚仲好脹...... 但飲完之後又真係可以即刻醫到頭暈，超有效。

但近排啲記憶都好亂。我竟然好似斷片咁對呢一、兩個月嘅事完全無記憶。唔知係咪佢哋對我做咗啲咩...... 依家睇翻12月嘅日記都覺得好奇怪...... 究竟係咪我寫......

千祈唔好信任何人。葉子穎，你要記住淨係可以信自己。

2039年3月17日 星期四 天氣：雨

好奇怪好奇怪好奇怪...... 

2039年4月6日 星期三 天氣：陰

好想記低近排發生過嘅事，但啲嘢都好零碎。零碎到，我可以轉頭就唔記得自己做過啲咩。可能飲太多...... 但唔係真係會好暈...... 下個禮拜終於有得放假，希望唞吓會好啲。

2039年5月6日 星期五 天氣：陰

要記得。

你係邊個...... 

佢哋

我都已經唔知

好頸渴......

2039年5月9日 星期一 天氣：

.

2041年8月22日 星期四 天氣：雨

今日突然發現咗呢本日記，無啦啦喺衣櫃深處連埋我啲衫跌咗出嚟。唔知係邊個㗎呢？但點解咁好笑會係嗰個位出現？但斷估唔會係我寫啦...... 呢本日記嘅主人，見你無寫落去就借嚟寫吓啦～（對唔住我太無聊～

你係咪叫葉子穎吖？我超耐都無同人傾過計啦，好開心識到你～ 呢度嘅人都叫我做阿萊，應該同你一樣係樂園嘅員工！都係度做咗一段日子㗎啦！

不過恕我冒昧，睇翻覺得你份人都幾怪下㗎窩，寫啲嘢咁散嘅？同埋樂園變有你寫得咁恐怖吖？樂園係一個提供極樂體驗俾外界嘅人享受嘅地方嚟㗎嘛，咁我哋作為員工就梗係理所當然咁要俾最好嘅服務佢哋啦～不過可能你一開頭入嚟先咁唔慣。我嗰陣都...... 應該係咁，可能太耐之前我都無乜印象啦。

但唔緊要，同你分享吓近排嘅開心事吖～話說琴日主管就話樂園自重新開業以嚟搞得越來越成功，亦都讚我哋做得好好，所以就獎我哋加人工！！真係好開心！佢仲話平時放假可以免費入樂園挽添，真係做咁耐都未試過自己挽。我諗你都會想試下㗎姐～ 其實我真係好感恩可以一直喺樂園度做，邊個會估到當年好似我呢啲咁嘅迷失青年可以有高薪厚職，又可以日日變裝試唔同造型呢？琴日華特先生仲親自宣佈咗話會幫我哋嘅制服身軀升級，可以用翡翠級別嘅套裝，唔知有咩唔同呢？聽講可以捱得耐啲，應該無咁痛掛。

如果你仲喺度做緊嘅話，希望你都仲鍾意呢度啦～ 因為我真係覺得其實我哋呢份工好有意義，華特先生都成日同我哋講返有幾多人因為樂園可以解決到佢哋外面嘅煩惱同痛苦。你唔覺得如果我哋辛苦少少就可以減輕其他人痛苦呢樣嘢好正㗎咩？真係唔容易㗎！

話說今日我抽到套老婆婆嘅皮，哇，搶手到呢，一開場就有人走埋嚟同我挽，後尾仲要越嚟越多人圍過嚟。唔知點解近排咁興挽呢味。不過今次都算快俾人殺死，所以都算輕鬆嘅。哈哈，諗起都好笑，佢哋哈，又真係對著阿婆挽得幾開心窩，真係好好笑😂。

好啦，我差唔多夠鐘要飲「營養飲料」啦，下次再同你傾過啦～

加油！加油！

2040年9月2日 星期一 天氣：晴

嗨！今日有樣開心事要同你分享～

就係我俾人揀咗做接受採訪嗰個吖～嚟緊就係樂園5週年嘅大日子，所以政府嗰邊都派咗人嚟紀錄低佢，而我就負責介紹樂園俾佢哋睇～好興奮吖！！！估唔到可以喺咁大型嘅拍攝度出現！唔知個日會著到啲咩款嘅制服呢？希望我喺鏡頭面前講嘢唔好一舊舊啦。

話時話，諗諗下覺得你個名有種好複雜嘅感覺，唔知點解...... 可唔可以話係似曾相識嘅感覺呢......？總之就好似...... 好神奇，好想有一日見下你真人。

（啲腳步聲好似越嚟越大...... 

係窩，同埋突然醒起